NTỤGHARỊ DỊKA AKỤRỤ NGWA DỊ OKE MKPA N’ỊKWALITE AHỤIKE NA ỌRỤ UGBO

Abstract

Ihe ọmụmụ a gbadoro ụkwụ na ntụgharị dịka akụrụ ngwa dị oke mkpa n’ịkwalite ahụike na ọrụ ugbo. E mere nke a n’ihi na ka oge na-aga, a na-enwe ihe ọhụrụ nakwa ụzọ ka mma i ji were na-eso ọnọdụ ahụike nakwa ọrụ ugbo. I ji hụ na ndị amaghị agụ maọbụ ede asụsụ Bekee na-erite uru dị n’ihe ọhụrụ ndị a batara na n’ọnọdụ ahụike na n’ọrụugbo, ọ dị mkpa na e mere ntụgharị. Site na ya, onye ọbụla ga-esonye nke ọma maka ọdịmma nke obodo. Nchọcha a bụ nke kwọlitetiv. E si n’akwụkwọ nzisaosi na nke mkpanaka e dere na Bekee gbasara ahụike na ọrụ ugbo were nweta data e ji mee nchọcha. Atụtụ na usoro ntụgharị Newmark (2001) ka a gbasoro. Ihe ọmụmụ a ga-aba uru maka na igbaso ezigbo usoro were na-ezi ozi na-eme ka ozi gbasaa nke ọma. Ọ ga-emekwa ka okwu ọhụrụ bata n’asụsụ Igbo nke na-eme ka asụsụ na-eto eto. Ihe ọmụmụ a nyere ntuziaka ka e mee ụdị nchọcha a n’ebe dị iche iche maka ọdịmma ndị anaghị agụ asụsụ Bekee nakwa ịmụba mkpụrụokwu n’asụsụ Igbo.